Камен-темелник на Ветерниот парк кај Штип беше поставен денеска. Изградбата е на компанијата „Алказар енерџи“, а инвестицијата вредна над 500 милиони долари треба да отвори 630 нови работни места. Ќе биде лоциран меѓу Штип, Карбинци и Радовиш на површина од околу 326 хектари.
Предвидено е да има 55 ветерници кои ќе произведуваат електрична енергија со која ќе се задоволат потребите на околу 100 илјади домаќинства.
Ко-основачот на „Алказар енерџи“ и генерален директор, Даниел Калдерон, на денешниот настан истакна дека македонската влада била таа што нив ги туркала како компанијата за поскоро завршување на работите, нешто што не било случај во останатите земји каде работи компанијата.
-Ова е редок момент кога после 12 годишно постоење на „Алказар“ никогаш досега немаме успеано да стигнеме до оваа фаза на подготвеност за градба и тоа точно во согласност во временската рамка, што ја договоривме со владата уште во јуни минатата година. Во нашето долгогодишно искуство, без разлика во која земја сме во светот, најважна за нас е дисциплината при работата со нашите партнери. Вообичаено кога ќе работиме за други проекти, ние сме тие кои треба да ги туркаме институциите и владите на земјите за да завршат нешто. Раководните лица во Владата на Македонија беа тие што нас не’ туркаа да ги завршиме работите побрзо и им благодарам, истакна Калдерон.
Тој посочи дека оваа инвестиција ќе отвори 600 работни места, ќе донесе чиста електрична енергија за над 100.000 домаќинство и ќе го намали загадување
Премиерот Христијан Мицкоски посочи дека како влада се сериозно посветени на економијата и силно веруваат дека земјата има голем потенцијал, па затоа како што рече, со гиганстки чекори одат напред.
-Исклучително е пријатно чувството бидејќи по нешто повеќе од една година, тоа што го ветивме заедно со компанијата, денеска добива некаква завршица, на првата фаза. Заедно со Даниел и соработниците најавивме инвестиција во делот на обновливата енергија во вредност од половина милијарда долари. Инвестиција која ќе биде модел како треба во иднина да се движиме. Ако нема дисциплина и јасна поставеност на еден проект, тогаш нема ништо. Ќе почне да се распаѓа сето она што го градите и на крајот нема да стигнете до посакуваната цел. Имаме уште многу идеи, но со компанијата тоа ќе го разговараме во некоја следна фаза, нагласи Мицкоски.
Министерот за транспорт, Александар Николоски смета дека како нација можеме да водиме големи проекти.
-Во еднос на економијата имаме директен и индиректен импакт. Директен е она што ќе се произведе и продаде кое директно влегува во БДП, а индиректниот е многу поголем. За стопанството, за индустријата затоа што светот оди напред. ЕУ ги постави правилата за зелена транзиција ги постави, а тие велат дека особено во металната, во челичната индустрија, во индустрииите кои придонесуваат најмногу за нашиот БДП, од 2026-та мора да се користи зелена енергија. Да дадеме шанса на нашата економија и компаниите да бидат конкурентни надвор на пазарот, вакви проекти ќе придонесат да бидеме лидери и во индустриското производство, истакна Николоски.
Ветерниот арк претставува и значаен чекор кон зајакнување на енергетската безбедност и целите за обновлива енергија на земјата.