Претседателот на Владата, Христијан Мицкоски, изјави дека активно се работи на привлекување нови инвестиции кои дополнително ќе ја раздвижат македонската економија.
„Во моментов во почетна фаза на реализација или во фаза на потпишување договори за државна помош се 17 проекти, во вкупна вредност од над 650 милиони евра, кои што треба да обезбедат 4.500-5.000 нови директни работни места. Очекувам оваа година најголемиот дел од овие проекти да бидат отпочнати со производство, што, исто така, ќе додаде вредност во вкупниот бруто-домашен производ на државава, а колку е тој поголем, толку повеќе ние ќе имаме пари за реализирање на ваков вид капитални инвестици“, изјави премиерот при увидот во градежните работи на автопатот Гостивар – Букојчани од коридорот 8.
Мицкоски е презадоволен и од растот во земјоделството.
„Навистина импресивни се резултатите во земјоделието во четвртиот квартал, повеќе од двојно е поголем извозот во земјоделието отколку увозот на земјоделски производи. Само во четвртиот квартал имаме околу 12,5 милијарди денари што е навистина импресивна бројка, споредено со целата година, имаме преку 450 милиони евра извоз на земјоделски производи, наспроти околу 200 милиони увоз“, истакна тој.