Девет полициски службеници од Велес денеска се соочуваат со обвинение за злоупотреба на службената положба и неизвршување на судска одлука, откако не постапиле соодветно по пријавите на Росица Коцева за семејно насилство.
Основното јавно обвинителство за гонење на организиран криминал и корупција утврдило дека во периодот од 21 февруари до 15 септември 2025 година тие не ги извршувале своите должности, со што тешко ги повредиле правата на Росица, вклучително и нејзиното уставно право на живот, како и правата од членовите 2 и 3 од Европската конвенција за човекови права.
Иако Росица постојано пријавувала семејно насилство и барала заштита, полициските службеници, според обвинението, не постапувале согласно законските обврски за заштита на жртвите.
Не биле почитувани одредбите од Законот за спречување и заштита од насилство врз жените и семејно насилство, ниту правилата за процена на ризик по животот и интегритетот на жртвата. Особено сериозен е наодот дека не постапувале ниту кога веќе постоеле судски мерки за заштита.
„Во услови кога биле изречени судски мерки за заштита на жртвата од семејно насилство, тие не постапувале по итните мерки за заштита“, соопшти Обвинителството.
Дел од обвинетите, иако постапувале по пријавите, не го известиле надлежниот јавен обвинител, а доказите ги чувале во просториите на Одделението за општ криминалитет при ОКП Велес, без да поведат постапка.
Обвинението е резултат на опсежни истражни дејствија спроведени од јавен обвинител од Специјализираното одделение за гонење кривични дела сторени од лица со полициски овластувања.
Росица пријавувала. Судот изрекувал мерки. Полицијата имала законска обврска да постапува. Но, според Обвинителството, деветмина службеници не ја исполниле таа обврска, а Росица денес не е жива.