Членови на македонскиот фудбалски клуб Рокдејл Илинден вечерва ќе се соберат за да му оддадат почит на Дан Елкајам, кој загина во вчерашниот вооружен напад на Бонди плажата во Сиднеј.
Елкајам бил популарен и талентиран фудбалер, дел од тимот што настапува во највисоката локална конкуренција, а во клубот играл околу една година. Клубот соопшти дека е „во шок и тага“ поради загубата.
Во нападот, кој полицијата го третира како терористички, двајца вооружени лица отвориле оган врз собир поврзан со еврејски празник. Потврдено е дека има најмалку 16 жртви меѓу цивилите, а 42 лица се повредени и се лекуваат во болници низ Сиднеј.
Заменик-претседателот на клубот, Лу Тасевски, изјавил дека „целиот тим е скршен“ и дека ќе се соберат „да се утешат меѓусебно“ по трагедијата. Генералниот менаџер и секретар на клубот, Луи Белевски, го опишал Елкајам како „прекрасен човек“ и „инспирација за играчите“.