Најпопуларниот спортски колектив на македонската заедница во Австралија, фудбалскиот клуб Престон лајонс, ја забележа првата победа во инаугуралното издание на обединетата втора лига на Австралија, позната како Австралиски шампионат, и тоа на гостински терен од 3:1 над Нортвестерн Сиднеј спирит.
Со двата гола на Џејсон Ромеро и едниот на Брендон Лаутон, составот на тренерот Љупче Ацески славеше убедливо на „Кристи Парк“ во Сиднеј, иако статистиката беше на страна на домаќинот: посед на топката 62:38 отсто, вкупно шутеви 40:18, удари во рамките на голот 28:12.
Клубот на Македонците во Австралија формиран во 1947 година како Престон Македонија по четири одиграни кола е втор во групата Ц со 5 бода, колку што има и НВС спирит, води Авондејл со 8, а последна е Канбера Кроејша со 5.
Двете првопласирани екипи во групата продолжуваат во елиминациите, а во следниот круг на 9 ноември „лавовите“ ќе го пречекаат лидерот Авондејл.