Основното јавно обвинителство Куманово донесе наредба за спроведување истражна постапка и предложи мерка притвор за 40-годишен жител на Кратово, за кого постои основано сомнение дека сторил кривично дело „Напад врз службено лице при вршење работи на безбедноста“.
Според Обвинителството, осомничениот на 11 септември нападнал службени лица при вршење работи на јавната безбедност поврзани со спречување кривично дело.
Кога двајца полицајци употребиле сила за да ја отворат заклучената врата од собата во која се наоѓал осомничениот, тој ги нападнал. При нападот, на еден од полициските службеници со нож му нанел тешки телесни повреди, меѓу кои прободна рана и посекотина.
Поради опасност од бегство и можност осомничениот да го повтори делото, јавниот обвинител до судијата на претходна постапка доставил предлог за определување мерка притвор.