Владата кажа дека го усвоила Предлогот за измени и дополнувања на Буџетот за 2026 година, со кој приходите и расходите се приспособуваат по мерките за намалување на акцизата и ДДВ-то за горивата. Со измените вкупните приходи се проектираат на 374,2 милијарди денари, а расходите на 420,5 милијарди денари. Разликата меѓу проектираните приходи и расходи изнесува 46,3 милијарди денари.
Од Владата нагласуваат дека буџетскиот дефицит, сепак, се задржува на непроменето ниво.
- „Со предложените измени се врши приспособување на приходната и расходната страна на Буџетот, како резултат на фискалното влијание од мерките што ги презеде Владата за поддршка на граѓаните и бизнисот, преку намалувањето на акцизата и ДДВ-то кај горивата“, соопшти Владата.
Оттаму велат дека измените треба да овозможат одржување на стабилноста на јавните финансии.
- „Целта на предложените измени е да се одржи стабилноста на јавните финансии, да се обезбеди непречено и редовно функционирање на институциите“, се наведува во соопштението.
Предвидено е и продолжување на реализацијата на владините програми и навремено сервисирање на обврските. Предлогот сега оди во Собранието, каде што треба да биде разгледан и усвоен.