Во Амбасадата на Соединетите Американски Држави во Македонија со свечен прием беше одбележан 4-ти јули – Денот на американската независност. Пред бројни гости, партнери и пријатели на САД, амбасадорката Анџела Агелер упати пораки за слобода, партнерство и заедничка иднина. Таа истакна дека, иако во овој дел од светот 249 години не се сметаат за многу, тоа за САД е доказ за една млада, но енергична и силна нација изградена врз темелите на слободата, самоуправувањето и заштитата на основните права.
- Стремежот кон посовршен сојуз ја повикува секоја генерација да се издигне, да се стреми кон повеќе и да гради иднина достојна на тие вредности, без разлика на предизвиците и кризите – порача Агелер.
Во својот говор таа потсети дека оваа година се одбележуваат и 30 години дипломатски односи и пријателство помеѓу Соединетите Американски Држави и Македонија.
- Три децении, Соединетите Американски Држави и Македонија ги издржаа глобалните шокови и политичката смена на генерации – и секој пат излегоа посилни. Тоа е отсликано во заедничките мисии во Ирак и Авганистан и големите вежби на Криволак, подготовките за заедно да се бориме за зачувуванье на мирот. Веќе три децении заедно му покажуваме на светот што може да се постигне со силина, компромис и трпение. Покажавме како изгледа вистинско пријателство и вистинско партнерство. Тоа е зачувуванье на вашето културно наследство со почит што му прилега на едно глобално богатство. Тоа се тешки, искрени разговори за теми од големо значење за двете наши земи. И тоа е тага која ја делиме со вас кога ќе изгубите млади и прекрасни животи во страшен пожар. Бог да ги благослови Соединетите Американски Држави, и Бог да ja благослови Македонија, рече Агелер.
Свеченоста ја збогати присуството на премиерот Христијан Мицкоски, министерот за внатрешни работи Панче Тошковски, гувернерот на Народната банка Трајко Славески, како и други високи претставници од Владата, дипломатскиот кор и граѓанскиот сектор.