Лидерот на ДУИ Али Ахмети на протестот во Скопје за поддршка на поранешните водачи на УЧК изјави дека судењето во Хаг треба да заврши со прогласување нивна невиност, бидејќи како што додаде, „сите оние, што се зад решетки, се обвинети за злосторства, кои не ги сториле“, објави ТВ21. Ахмети рече дека УЧК не била против ниеден народ, ниту им ја негирала слободата на другите, туку барала слобода за сопствениот народ. „Ја сакавме слободата, но не одрекувајќи им ја слободата на другите народи. Нашата армија не беше против ниеден народ, ниту против српскиот народ. Денешните демонстрации не се против државата Македонија.“ – кажа Али Ахмети.
На протестот на ветераните и поддржувачите на УЧК на па плоштадот „Скендербег“ во Скопје учесниците искажаа поддршка и побараа правда за поранешните водачи на ОВК кои се на судење во Хаг. Покрај лидерот на ДУИ Али Ахмети и раководството на оваа партија, меѓу учесниците на протестот беше и Зијадин Села од Алијансата на Албанците. Беа дојдени и поранешните команданти на косовската УЧК Даут Харадинај и Фатмир Лимај, како и политички личности на Албанците од Македонија и од Балканот.
„УЧК не беше криминална организација, туку се бореше за правата и за еднаквост на Албанците. За време на конфликтот се почитуваа сите меѓународни конвенции. Не е точно тоа што е наведено во обвинението за поранешните водачи на ОВК, на кои им се суди во Хаг. Испраќаме порака до сите меѓународни чинители дека треба да има правда за овие луѓе.“ – беше речено на протестот.
Додека траеја обраќањата, учесниците на протестот скандираа во знак на поддршка на УЧК. Се вееја знамиња на Албанија, Косово и САД. Дел од присутните носеа и фотографии од обвинетите. Протестот помина мирно, но можеше да се забележи бројно полициско обезбедување.
Премиерот Христијан Мицкоски пред три дена изјави дека Владата не го поддржува маршот на ветераните и поддржувачите на УЧК во Скопје, како и дека е формиран кризен штаб кој ќе ги следи случувањата поврзани со настанот.