Управата за јавни приходи потсетува дека на 16 април истекоа законските рокови за плаќање на разликите по годишните даночни биланси за 2025 година и ги повикува обврзниците што сè уште не извршиле уплата, да го сторат тоа без одлагање.
- Навременото плаќање на даноците е клучно за стабилни јавни финансии и за непречено функционирање на јавните услуги, додека ненавременото плаќање значи зголемување на долгот поради камата и ризик од присилна наплата, блокирање на банкарските сметки и други мерки. Од вкупно 19.550 поднесени биланси за данок на добивка, данок на вкупен приход и данок на личен доход кај вршителите на дејност во кои е искажана обврската за плаќање, кај 10.252 е евидентирана уплата, што укажува на солидно ниво на даночна дисциплина – потенцираат од Управата.
УЈП веќе испраќа персонализирани известувања до компаниите и до вршителите на дејност со заостанати долгови.
- Апелираме за итно плаќање на долговите со цел да се избегнат дополнителни трошоци. Во спротивно, ќе следува присилна наплата со дополнителни давачки како еднократна такса и банкарски трошоци, кои го зголемуваат вкупниот долг и ќе влијаат врз тековното работење – се наведува во соопштението.
УЈП потсетува дека може да се намират обврските и преку уплата од трето лице, како и преку пребивање со даночно побарување на обврзникот, а на располагање е и можноста за плаќање на рати, согласно со законските услови.