Македонија

Албанските лидери да ја осудат реториката што го поткопува територијалниот интегритет на Македонија, бара албанска организација од САД

Советот за албански американски односи (ААРК) ги повика сите партии за елиминирање на етнички заснованата реторика

Советот за албански американски односи (ААРК) од САД бара смирување на страстите во Македонија по националистичките скандирања на навивачите во Куманово и во Скопје, повикувајќи ги албанските лидери во земјата да го осудат поткопувањето на територијалниот интегритет.

„Во последните недели имаше загрижувачко зголемување на инцидентите на спортските настани во Северна Македонија кои поттикнуваат етничка омраза и поделба. На кошаркарскиот натпревар помеѓу Романија и Северна Македонија во Куманово навивачите извикуваа ужасни пароли со кои се повикуваше на смрт на Албанци и нивно исчезнување во гасни комори. Како одговор, некои албански навивачи на фудбалски натпревар во Тетово покажаа транспаренти со кои се повикуваше на отцепување.

Оваа опасна спирала мора веднаш да се запре. Политичките лидери од сите заедници мора да дејствуваат решително за да ги осудат и спречат ваквите прикази на омраза пред тие дополнително да ја дестабилизираат земјата.

Антиалбанските скандирања болно го зајакнаа долгогодишниот впечаток кај Албанците дека се третирани како граѓани од втор ред и странци во сопствената татковина. Од друга страна, пораките за отцепување всадија страв кај словенските Македонци за намерите на Албанците и идното единство на државата.

Од потпишувањето на Охридскиот рамковен договор во 2001 година, Северна Македонија постигна значителен напредок кон интеграција и етнички соживот. Иако предизвиците остануваат, Албанците се префрлија од маргините кон активно учество во политичките, економските и академските институции. Овој напредок не смее да се поништи.

Иако осудата на говорот на омраза од страна на Владата дојде доцна, таа беше јасна. Сега, албанските лидери мора недвосмислено да ја осудат секоја реторика што го поткопува територијалниот интегритет на земјата.

За време на конфликтот, Албанците ја отфрлија понудата за поделба на Македонија по етнички линии, избирајќи наместо тоа заедничка европска иднина. Истиот овој принцип мора да продолжи да ја води нацијата напред. Сите партии мора да работат заедно за да ја елиминираат етнички заснованата реторика и да спречат враќање кон темните поглавја од минатото. Само преку единство, почит и лидерство Северна Македонија може да остане на патот кон траен мир и европска интеграција“, се вели во соопштението на ААРК, пренесено од косовскиот весник „Експрес“, со неколку „фаули“ од типот „словенски Македонци“ и Тетово наместо Скопје, кадешто всушност се скандираше за Голема Албанија и за Илирида.

По трагедијата во Кочани, ААРК излезе со соопштение со кое изрази длабоко сочувство за настраданите.

Најнови вести од: Македонија

(Фото): Хаос на „Евзони“ – граѓани со часови чекаат за излез од Грција

Огромни кологи и долги саати чекање на граничниот премин „Евзони“ пријавуваат македонски граѓани. Од голема гужва пред границата стојат веќе три до четири часа, а притоа немаат информации за прекини во работата на границата, ниту пак за штрајкови. 

Паѓаа дрва, се откорнаа покриви од згради – невреме ја зафати Македонија

Скопскиот регион, но и делови од Македонија, попладнево беша погодени од силно невреме проследено со ветер и дожд, по што речиси истовремено избија повеќе пожари на отворен простор, видливи од голем дел од градот и предизвикувајќи вознемиреност кај граѓаните.

To top