„Стандардот што Арбен Таравари се обидува да им го наметне на Албанците во политичкиот живот е модел опасен и деструктивен. Таравари ја претвора политичката проституција во прифатлива норма, дури и во официјалната политика!“ – напиша во својата објава на фејсбук Лулзим Алити, координаторот за дијаспоратa за Франција во крилото на АА на Арбен Фетаи, реагирајќи жестоко против Арбен Таравари и неговата одлука да стапи во „опозициски брак“ со Али Ахмети и ДУИ.
На општествената мрежа Лулзим Алити натаму истакнува: „Овој пристап го саботира секој обид за морална реформа на албанската политичка сцена и испраќа опасна порака до младите луѓе и пошироката јавност: дека политиката повеќе нема поврзаност со принципите, туку оти станала пазар на лични калкулации, заради преживување и профит. Мора да постојат идеолошки и морални граници, што не смеат да се преминат. Во спротивно, целата албанска политичка сцена ќе се деградира во пазар без вредности.“
„Не можеш вчера да ја нарекуваш ДУИ ‘политички мртва’, да ја обвинуваш за корупција и непотизам, да упатуваш најтешки обвинувања кон Али Ахмети, а денес, заради некоја ладнокрвна лична калкулација да завршиш во неговиот скут како да не се случило ништо! Она што го нуди Арбен Таравари денес не е визија ниту за Албанците, ниту за Македонците, или за која било друга заедница во оваа држава!“
„Тоа е пат без враќање, што води кон колективно разочарување, кој води повторно кон минатото, но овој пат со нова шминка и со лажни насмевки. А граѓаните нема да го прифатат ова.“ – предупреди Лулзим Алити од крилото на Алијансата на Албанците на вицепремиерот Арбен Фетаи.