Министерот за здравство Азир Алиу извести дека работна група бара начин како да ги ослободи од партиципација речиси 200-те повредни во пожарот во дискотеката „Пулс“ пред речиси една година и кои се принудени да доплаќаат за здравствените услуги.
„Дефинитивно ние работиме на креирање на програма бидејќи знаете партиципација е законска надлежност за да може на секоја институција да се плати за секој пациент. Разговараме со работната група да најдеме начин како тоа да влезе во некоја од постојните програми кои што ги имаме.
Тоа ни е едно од ветувањата, лично мое и на Владата за да може да се реши тој проблем. Таа партиципација, колку и да е мала, треба да се отстрани со цел да може таа комуникација меѓу институциите и семејствата или граѓаните кои имаат некаков тип на барање на третман да можат да не плаќаат партиципација“, рече министерот Алиу денес при посетата на болницата во Кочани во која почнаа активности за уредување на дворот.