Министерот за дигитална трансформација, Стефан Андоновски, изјави дека е неопходно да се овозможи електронско гласање за дијаспората и дека во наредните три години, паралелно со напредокот на дигитализацијата, може да се изгради систем што ќе го гарантира тоа право.
„Многу е важно да ѝ се дозволи на дијаспората да гласа. Ова се луѓе што во Македонија годишно внесуваат над една милијарда денари во дознаки, со што ја поддржуваат македонската економија, своите сограѓани, семејства и пријатели, а често отвораат и сопствени бизниси“, рече Андоновски за време на неговиот престој во Прилеп.
Тој нагласи дека не е фер дијаспората да мора да патува илјадници километри за да го оствари уставно загарантираното право на глас – еднаш за регистрација и вторпат на денот на гласањето.
„Со измените на Изборниот законик треба да се предвиди до 2029 година да биде подготвен систем што ќе им овозможи на регистрираните државјани со македонски пасоши кои живеат во странство да гласаат онлајн“, додаде министерот.
Андоновски посочи дека земјата веќе има систем за дигитален идентитет преку порталот услуги.gov.mk и дека тој може да се доразвие во соработка со Државната изборна комисија.
„Ако има политичка волја, тоа е изводливо“, заклучи тој.
Во Собранието неодамна пропадна уште еден обид за постигнување договор за измени на Изборниот законик, при што најголемиот спор повторно беше токму начинот на гласање на дијаспората.
Од опозицискиот СДСМ велат дека не се против правото на дијаспората да гласа, но се против модели што можат да отворат простор за изборни злоупотреби. Од ВМРО-ДПМНЕ, пак, ги обвинуваат опозициските партии дека го блокираат законот поради страв од изборен пораз.