„Шефот на изборниот штаб на коалицијата Вреди Аднан Азизи остро реагираше на повиците на лидерот на ДУИ Али Ахмети ВЛЕН да ја напушти владата. Во реакција на Фејсбук, Азизи го потсети Ахмети дека останал во владата дури и во најтешките моменти за Албанците и оти затоа денес нема морален легитимитет да бара оставка од другите.“ – пренесе информативниот портал на албански јазик „Фол“.
Порталот пишува: „Али Ахмети не ја напушти владата кога се случија голема низа трагични и сериозни настани со Албанците, за кои ДУИ и тој не само што не презедоа одговорност, туку останаа цврсто на власт. Ахмети не ја напушти владата ниту кога Албанците беа дефинирани во Уставот како ‘20 проценти’. Затоа тој нема морално право да бара од другите да си замина од владата.“ – посочува Аднан Азизи.
Азизи го нарекува Али Ахмети „исцрпен и изморен политичар“. Според Аднан Азизи од Вреди, „Али Ахмети помогнал во политички процеси против Албанците, стоел зад проекти за деалбанизација на Скопје и помогнал во составувањето на озлогласената антиалбанска Македонска енциклопедија“. „Али не избега од власт кога Скопје беше деалбанизирано со моноетничкиот проект ‘Скопје-2014’, ниту кога младите Албанци масовно избегаа на Запад. Денес кога Албанците се дел од владата со целосен авторитет и достоинство, тој бара да си заминеме, само за да можат тој и ДУИ да се вратат на власт.“ – наведува Азизи.
Азизи подвлекува дека, „според логиката на Ахмети, Албанците треба да бидат во владата само за да им служат на македонските лидери и да молчат пред неправдите“. „Ова е логиката на идеолошки болен славокомунист.“ – заклучува Азизи, пренесе „Фол“.