Јавното претпријатие „Комуна“ од Крушево, повикувајќи се на информациите од Центарот за јавно здравје – Прилеп, соопшти дека водата во Крушево е бактериолошки неисправна. На жителите им се препорачува за пиење да користат исклучиво пакувана вода.
„Исто така, при испитувањето на крајпатните чешми „Бензинска пумпа“ и „Св. Петка“, земени на 20 јули, е констатирана бактериолошка неисправност и истите не смеат да се користат како вода за пиење“, нагласуваат од претпријатието.
Според „Комуна“, водата од градскиот водовод може да се користи за лична хигиена, подготовка на храна, перење и миење садови само по претходно превривање од најмалку 10 минути.
„Исто така, информираме дека се врши редовно хлорирање на водата и секојдневно се врши контрола на присуството на хлор. Препораките важат сè до добивањето на три последователни исправни примероци од водата“, посочуваат од претпријатието.
Од таму додаваат дека Центарот за јавно здравје – Прилеп ќе остане во постојана комуникација со надлежните институции и навремено ќе ги информира жителите на Крушево за актуелната состојба.