Голем прекин во работењето на интернет-инфраструктурниот гигант „Cloudflare“ предизвика блокада на пристапот до голем број популарни веб-страници низ светот, меѓу кои и платформата „Чет ГПТ“ (ChatGPT) и социјалната мрежа Икс (порано Твитер). Проблемот започнал околу 13 часот по источно американско време, а веќе по 15 минути компанијата објавила дека е свесна за дефектот.
Од „Cloudflare“ соопштија дека станува збор за внатрешна техничка грешка – латентен баг во системот за заштита од ботови, кој се активирал по рутинска промена на конфигурацијата. Ова предизвикало масовно нарушување на мрежата и на другите услуги. Компанијата нагласи дека не станувало збор за кибер-напад.
Дејн Кнехт, главен директор за технологија на „Cloudflare“, на Икс упати извинување за непријатностите што им го предизвикале на корисниците и посочи дека се работи на тоа во иднина да нема ваков прекин.
Инаку, проблемот зафати и повеќе македонски веб-страници, вклучувајќи медиуми, агретори на вести и институции.
„Cloudflare“ го користат стотици илјади корисници низ целиот свет, кој дејствува како тампон меѓу нивните веб-страници и крајните корисници, работејќи на заштита на нивните страници од напади што би можеле да го преоптоварат со сообраќај.
„Cloudflare“ обезбедува основни интернет-услуги, вклучувајќи заштита од кибернапади и алатки за одржување на стабилноста на веб-страниците при големо оптоварување.Нивните услуги, кои обично, се невидливи за крајните корисници, ги користат огромен број компании во светот, а дефектот во нивниот систем има далекусежни последици.Ова доведе до паѓање на широк спектар на навидум неповрзани веб-страници, слично на она што се случи минатиот месец со техничките проблеми во „Амазон веб сервисис“ (Amazon Web Services).