„Цоки Стојаноски (Тетово, 9 јануари 1973 – Брвеница, Тетовско, 31 јули 2001) бил македонски бранител, полицаец на СВР Тетово и учесник во воениот конфликт во Македонија во 2001 година. Загинува во заседа кога врз напад врз полициски пункт и службеното возило, во кое се наоѓал тој, терористите отвориле оган од пушкомитралези и минофрлачи. Починал на самото место од тешките прострелни рани во градите.“ – пишува на Википедија за овој трагичен настан, случен на денешен ден, на 31 јули 2001 година.
Живот, војната 2001 и смрт
На полноќ на 31 јули 2001 година, во пресрет на големиот Илинден, Цоки бил на работното место на полициски пункт кај објектот на поранешното Радио Тетово, на патот Тетово – Брвеница. Стојаноски бил тогашен полициски службеник во Полициската станица за безбедноста на патниот сообраќај. Беше убиен на 28-годишна возраст. Остави во тага семејство со две малолетни деца, на чие детство неизмерно се радуваше и им го посветуваше секој слободен миг од својот динамичен живот.
Колегите од полициската станица за безбедност на патниот сообраќај во Тетово својот колега ќе го паметат по бестрашноста, високата професионалност и нескриениот патриотизам. Цоки Стојановски посмртно е одликуван со медал за храброст од Претседателот на Р Македонија.
Спомен биста на Цоки Стојановски има и во кругот на Полициската станица за безбедноста на патниот сообраќај и во селото Туденце.
„Делегација на Општинскиот комитет на ВМРО ДПМНЕ од Тетово денес положи свежо цвеќе во чест и помен за Цоки Стојаноски, македонски херој, полицаец на СВР Тетово и учесник во воениот конфликт во Македонија во 2001 година. Цоки го даде својот живот во одбрана на Република Македонија. Нека му е вечна слава на херојот! “ – објави на својот фејсбук-профил Александар Велјановски, пратеник во Собрането на Република Македонија и претседател на Општинскиот комитет на ВМРО ДПМНЕ.
Користена и статија на „Сакам да кажам“