Во периодот јануари–јуни 2026 година, вкупните приходи во државниот Буџет изнесуваат 169,9 милијарди денари, што претставува раст од 8,6% во однос на истиот период лани и реализација на планот од над 45%.
Министерката за финансии, Гордана Димитриеска-Кочоска, во Собранието при презентацијата на ребалансот на Буџетот за 2026 година, оцени дека јавните финансии се стабилни, приходната страна се движи согласно очекувањата, а расходите се насочени кон исполнување на законските обврски и приоритетните политики.
Даночните приходи изнесуваат 96,7 милијарди денари. Најголем дел од нив се од ДДВ – 43,3 милијарди денари (раст од 16,4%). Приходите од данок на личен доход изнесуваат 17,5 милијарди денари (раст од 11,7%), од данок на добивка 13,8 милијарди денари (раст од 14,5%), а од акцизи 13,9 милијарди денари.
Социјалните придонеси, како важен извор за пензискиот и здравствениот систем, достигнаа 58,8 милијарди денари, со раст од 7,5% во однос на лани.
На расходната страна, Буџетот е реализиран во износ од 205,9 милијарди денари. Исплатени се 58,1 милијарди денари за пензии, 25,5 милијарди за здравство, 7,6 милијарди за социјална заштита, а кон општините се трансферирани 15,1 милијарди денари блок-дотации плус 2,4 милијарди од ДДВ.
Капиталните расходи изнесуваат 19,4 милијарди денари, што е значителен раст од 53,5% на годишно ниво. За Коридорите 8 и 10-д се реализирани 6,3 милијарди денари, а за општински проекти 2,1 милијарди денари.
Министерката Димитриеска-Кочоска истакна дека државата во првата половина од годината ги сервисирала сите обврски кон домашните и странските кредитори, со што се одржува довербата на инвеститорите и меѓународните финансиски институции.