Грчкиот портал „Прототема“ објави сведоштва од патници кои рекле дека во авионот се слушала голема бучава и се скршил прозорец. За време на спуштањето дел од оштетениот мотор се одвоил и удрил во прозорец на кабината, поради што дошло до пад на притисокот во кабината. Патниците сведочеле како го држеле Србинот, кој седел покрај скршениот прозорец, откако воздухот го повлекол кон надвор. „Се слушна бучава како да пукнала гума. Настана паника со вресоци бидејќи веднаш изгубивме висина од декомпресијата. За момент помислив дека некој случајно ја отворил вратата за итни случаи. Сите веднаш ги ставивме маските, но ни требаше време да сфатиме што се случува“, изјави еден патник.
Претседателот на синдикатот на вработените во јавниот превоз Михалис Јанакос изјави дека е избегната трагедија, зашто телото на патникот летнало во воздух, но сопругата успеала да го задржи и да го врзе, по што помогнале и други патници, повлекувајќи го назад во кабината. Тој е задржан во болница во Солун поради изгореници од триењето и повреда на вратот.
Авионот летал од Солун кон Меминген во Германија. „Авионот слета нормално, а патниците се вратија на терминалот.“ – наведува „Рајанер“ во своето соопштение.