Екс функционерот од ДУИ Рафис Алити кој беше пратеник и директор на Македонска пошта бара федерализација на Македонија.
Според Алити федерализацијата е иднината на Македонија.
Во својата колумна објавена на порталот Zyrtare.net Алити кој е познат како ,,Командант учител” од 2001 година, оценува дека единственото решение за иднината на Македонија е нејзиното федерализирање според моделите на Тирол, Белгија или Канада.
Алити вели дека Македонија де факто е бинационална држава, но де јуре останува унитарна, што според него претставува експеримент кој не функционира.
Тој ја обвинува македонската политичка елита и „псевдопатриотите“ дека работат против соживотот и иднината на државата, наводно во служба на политиките на Белград и Москва.
„Албанците ја сакаат Македонија и сакаат соживот, но рамноправен со Македонците“, пишува Алити.
Тој критикува дека македонската политичка елита систематски ги крши или заобиколува правата на Албанците гарантирани со Уставот и Охридскиот рамковен договор.
Како главни проблеми ги наведува:
Неимплементирање на Законот за јазиците;
Необезбедување на правично и адекватно претставување;
Непроведување на децентрализацијата;
Непропорционална распределба на средствата и дискриминација во сите сфери на животот.
Алити особено остро го критикува Уставниот суд, кој според него донесува „скандалозни и еднострани“ одлуки под влијание на власта, при што албанските судии се прегласуваат.
Тој ги спомнува одлуките за Законот за употреба на националното знаме, Законот за јазици, укинувањето на Балансерот, како и одземањето на правото родителите да го запишуваат етничкото потекло на децата.
Колумнистот ги повикува пратениците, и албански и неалбански, да не гласаат за закони кои им штетат на Албанците, бидејќи ќе сносат одговорност.
„Овие права и уставните измени од 2001 година се извојувани со крвта на борците и мачениците на УЧК“, заклучува Рафис Алити.
Колумната доаѓа во време на постојани етнички тензии кои се наметнуваат од страна на ДУИ околу имплементацијата на Охридскиот договор и прашањето за правата на Албанците во Македонија.