ЕУ го планира својот најголем досегашен ангажман за борба против шумските пожари ова лето, јави ДПА.
Со оглед на зголемениот ризик од шумски пожари низ Европа, речиси 800 пожарникари од 14 земји ќе бидат распоредени во особено ранливите области во Кипар, Грција, Италија, Франција, Шпанија и Португалија, изјави денеска претседателката на Европската комисија, Урсула фон дер Лајен.
Покрај тоа, 22 авиони и пет хеликоптери од флотата на ЕУ се во состојба на подготвеност за да обезбедат поддршка.
– Ова е европската солидарност на дело. Пожарникарите од целиот наш континент споделуваат една мисија: да ги заштитат луѓето, домовите и шумите – рече Фон дер Лајен.
Проектот се координира и финансира од Европската комисија преку Механизмот за цивилна заштита.
Иницијативата е поддржана со деноноќна координација и помош од експерти во Центарот за координација на итни случаи. Понатаму, ЕУ планира да формира нова Европска регионална противпожарна станица во Кипар за да ги зајакне капацитетите за превенција и одговор на шумските пожари низ Европа и во регионот на Јужниот Медитеран, беше соопштено.
Шумските пожари во Европа минатата година изгореа повеќе од еден милион хектари, што е најголема површина досега евидентирана, се вели во извештајот за состојбата на европската клима објавен од Светската метеоролошка организација (СМО) и Службата за климатски промени Коперник на ЕУ.