Министерот за правда Игор Филков признава дека Европската комисија укажува на реални предизвици во судството, но нагласува дека тие бараат системски решенија, долгорочна стратегија и координација меѓу институциите, а не само административни мерки.
„Но, исто така мора да кажеме нешто што често се премолчува, финансиската независност не значи финансиска неограниченост. Таа мора да оди заедно со одговорност, транспарентност и рационално трошење. Секој потрошен денар во судството мора да биде оправдан со резултати – побрзи постапки, поголема доверба и повисок квалитет на судските одлуки“, вели Филков во интервју за МИА, каде зборува и за новиот Кривичен законик, реформската агенда, Изборниот законик и случајот со пожарот во модуларната болница „Пулс“.
Во Извештајот на ЕК за 2025 година се констатира стагнација во судството и фундаменталните права, со загриженост за независноста, непристрасноста и можното политичко мешање. На прашањето за ова, Филков одговара дека извештаите траат 20 години, но реформите се започнати.
Тој ја критикува методологијата што регистрира само конечни резултати, игнорирајќи ги преземените чекори. Во последните 18 месеци, Министерството подготвило низа закони: за Судскиот совет, платите на судиите и обвинителите, судската и обвинителската служба, платите на членовите на советите, спречување корупција, заштита на укажувачи, парнична постапка, процена, вештачење, слободен пристап до информации. Во финална фаза се законите за помилување, пробација, заштита на лични податоци, граѓанска конфискација и други.
„Правиме длабоки, структурни промени кои не можат да се измерат само со квантитативни индикатори или со перцепции. Извештајот на Европската комисија е само поттик за Министерството за правда да продолжи активно да работи на постигнување на европските стандарди во насока на спроведување на реформите“.
Целото интервју на Филков можете да го најдете на линкот.