Ако не се задолжиш, тешко дека ќе опстанеш, со оглед на високите цени на буквално се. Па така, како последно, компаниите и граѓаните на банките во април вкупно им должеле 8,268 милијарди евра, или долгот на граѓаните изнесува 4,168 милијарди евра, а на компаниите 4,056 милијарди евра. Вкупните депозити, пак истиот месец изнесувале 9,771 милијарди евра од кои 6,644 милијарди се депозити на граѓаните. Ова го покажуваат податоците кои ги објави Народната банка.
Граѓаните во април најмногу се задолжувале со потрошувачките и станбените кредити. Тие бележат месечно зголемување од 0,9% односно од 1,1%,и годишен раст од 9,1% и од 14,0%.
Во април, автомобилските кредити забележаа раст на месечна и на годишна основа за 0,4% и 2,3%, додека кредитите одобрени на кредитни картички остварија месечен раст од 0,3%, при годишен пад од 7,9%. Негативните салда на тековните сметки, во април, забележаа месечно намалување од 9,3%, во услови на годишен раст од 0,1%. Во април, кредитите одобрени врз други основи бележат месечен и годишен пад од 2,3% односно 9,0%.
Податоците на Народна банка покажуваат дека вкупните депозити во април на годишно ниво, забележале раст од 11,6%, додека вкупните кредити пораснале за 11,8%.
Само во април депозитите пораснале за 0,4% и тоа благодарение на депозитите на граѓаните кои пораснале за 2% во однос на претходниот месец. Во април раст бележат и вкупните кредити и тоа од 0,8% како резултат на кредитите во двата сектора, но е поизразено во корпоративниот сектор каде што е забележан раст од 1%.
Во април, кредитите на домаќинствата забележаа месечен и годишен раст од 0,6% односно 9,8%, а кај корпоративниот сектор растот е од 1,0%, на месечно ниво и од 14,1% на годишно ниво.