Катастрофална е состојбата по поплавите на улицата „Прилепска“ во Кичево. Жителите загрижени, ги чистат своите домови кои се полни со вода, откако реката Зајаз, која минува покрај населбата, излезе од коритото. По поплавите, откако беа сместени во спортската сала, ги посети градоначалникот на Кичево. Тој вели дека им се обезбедни душеци, греење и храна. Поради големото количество на вода службите не можат да влезат со механизација да го расчистат теренот. Формиран е кризен штаб, ќе ги посетуваат лекари два пати дневно и ќе бидат ангажирани хигиеничарки од општината да ја одржуваат хигиената.
Планот на општината е откако ќе се повлече нивото на реката, да се направи конечно насип за да не се излева реката при обилни дождови. На неколку години при непогодно време, постојано им се поплавуваат домовите на овие жители бидејќи живеат многу блиску до реката.
Обилните врнежи од дожд во изминатите неколку денови предизвикаа сериозни поплави, одрони и проблеми во сообраќајот низ цела држава. Поплавени се домови, подруми, магацини а уништени се и земјоделски површини. Една од покритичните точки покрај Охрид и Кичево е и Ресен. Надојдената вода предизвикала сериозни материјални штети а ја загадила и водата за пиење.
Од УХМР велат дека и понатаму најкритични се реките Вардар, Треска, Црна Река, Крива Река и Пчиња. Педупредуваат за претпазливо движење покрај реките и суводолиците.