Претседателот на Собранието Африм Гаши, заедно со претседателката на Комисијата за финансирање и буџет Сања Лукаревска и потпретседателот на Комисијата за локална самоуправа Пеце Милевски, денеска остварија средба со делегација на Конгресот на локалните и регионалните власти на Советот на Европа.
Делегацијата ја сочинуваа коизвестителите за локална демократија Андерс Кнапе од Шведска и Матијас Гисин од Швајцарија.
На средбата во фокусот беше спроведувањето на Европската повелба за локална самоуправа, како и почитувањето на човековите права и владеењето на правото на локално ниво.
Претседателот Гаши ја истакна децентрализацијата како важен демократски принцип што овозможува одлуките кои непосредно ги засегаат граѓаните – кога тоа е возможно и соодветно – да се носат на локално ниво, земајќи ги предвид нивните реални потреби и специфичностите на локалните заедници.
Тој потсети дека децентрализацијата е еден од клучните столбови на Охридскиот рамковен договор од 2001 година, со кој беше предвидено зајакнување на локалната самоуправа и поголемо учество на граѓаните и заедниците во процесите на локално одлучување.
Соговорниците подробно ги разгледаа прашањата поврзани со независноста на локалните власти и текот на децентрализацијата, со посебен акцент на финансиската децентрализација и финансиската автономија, како и на надлежностите на градоначалниците и општинските совети.
Разговорот се осврна и на предизвиците со кои се соочуваат општините – финансиската одржливост, заштитата на животната средина, демографските промени и административните и институционалните капацитети – како и на можностите за натамошно унапредување на локалната самоуправа.
Конгресот на локални и регионални власти редовно изготвува извештаи за состојбата со локалната и регионалната демократија во секоја земја-членка на Советот на Европа, со цел да се осигури имплементацијата на принципите на Европската повелба за локална самоуправа.
Мониторинг-комисијата на Конгресот е телото што ги подготвува овие извештаи и врши постојан надзор над спроведувањето на препораките. Последниот извештај за Северна Македонија беше изготвен во 2021 година.