Прашан за уставните измени во „Само интервју“ на Канал 5, собранискиот спикер Африм Гаши истакна дека растел, студирал и работи со Македонци и не може да направи нешто за кое тие би помислиле дека го загрозува нивниот идентитет.
„Позицијата на ВЛЕН и на сите пратеници Албанци е дека можеме да почнеме со уставни измени и да ги изгласаме уште денес, дека тоа би било добро за евроинтеграцијата. Но, секогаш сме имале на ум и кога беше спорот со Грција, и сега со Бугарија, за среќа и се радувам за тоа, албанските политички партии не сакаат тоа да го прават на сметка на загрозеноста на македонскиот идентитет. И тоа е многу добар елемент во нашата држава. Тоа треба да го храниме и да го промовираме. И јас мислам дека секогаш треба да бидеме внимателни со тоа. На мене ми е важно пред сè како живеам со моите соседи. Јас сум растел со Македонци, сум студирал заедно со нив, работам со нив и не можам да направам нешто што би било против нивниот идентитет и тие да мислат дека јас сум причината што им е загрозен идентитетот. Истото го очекувам и од нив. Ова е многу суштинска работа“, рече Гаши.