Минатата недела Апелацискиот суд во Скопје ја потврдил пресудата на Граѓанскиот суд во Скопје, со која Насер Селмани е осуден за клевета и навреда.
Селмани објавува дека според Судот тој клеветел една национална телевизија и нејзиниот директор (Канал 5 и Иван Мирчевски) затоа што на суд не го докажал своето тврдење дека „медиумите сеуште се контролирани од партиите и владата“ и дека „директорот на телевизијата врши притисок врз новинарите“.
Селмани е новинар и поранешен претседател на Здружението на новинари на Македонија.
,,Потсетувам дека истиот директор во 2023 година пред целата македонска јавност се вмеша во дебатна емисија на новинар, прво се обиде да го избрка гостинот, а потоа му нареди на новинарот да ја прекине емисијата”, објави Селмани кој открива дека аудот не досудил штета, туку го обврзал да плати адвокатски трошоци на тужителите и да објави дел од пресудата во еден дневен весник.
,,Ова информација ја споделувам со Вас не дека јас лично сум засегнат, туку дека оваа пресуда може да има несогледливи последици врз слободата на говорот во Северна Македонија ако не се реагира навремено.
Жално е што судот уважи тужба, која ако доселедно се почитуваше Законот и судската пракса од Европскиот суд во Стразбург мораше да падне.
Овие тужби во принцип судот треба да ги отфрли затоа што се користат како средство за вознемирување, ограничување или казнување на слободното избразување на теми од јавен интерес. Нивната цел е да малтретираат, заплашуваат и замолчуваат критични гласови во општеството и да предизвикаат „ефект на одвраќање“ од јавна дебата”, смета Селмани кој пишува дека препознавајќи го проблемот, Советот на Европа во 2024 година донесе Препорака CM/Rec(2024)2, за борба против употребата на стратешки тужби против јавното учество (SLAPPs).
,,Во ова препорака Советот на Европа ги потсетува земјите членики на обврската да овозможат безбедно и поволно опкружување за учество во јавна дебата за секого, без страв, дури и кога нивните мислења се спротивни на оние кои ги бранат официјалните власти или значајни делови од јавноста.
Препораката потенцира дека слободните избори, слободата на изразување, посебно слободната политичка дебата, заедно претставуваат столб на секој демократски систем и дека соодветно има мал обем на ограничувања на политичкото изразување или дебата по прашања од јавен интерес.
Ги повикувам новинарските здруженија, ЗНМ, Синдикатот на новинари, СЕЕМ и други невладини организации кои се занимаваат со заштита и промоција на слободата на медиумите, внимателно да ги следат и да реагираат соодветно на ваквите опасни обиди за ограничување на слободата на говорот.
Исто така, ја повикувам Делегацијата на Европската унија во Скопје, амбасадите на САД, Германија, Франција и на Велика Британија, да ги известат нивните влади за оваа негативна судска пракса која се воспоставува во Северна Македонија, која сериозно ја ограничува слободата на говорот во земја членка на НАТО и кандидат за ЕУ”, пишува Селмани.