Во овој контекст градоначалникот на Скопје Орце Ѓорѓиевски денес објави на својот официјален фејсбук-профил: Кејот на Вардар во Маџир Маало доби нов лик!
Денес заедно со министерот за спорт Борко Ристовски, ги пуштивме во употреба обновените спортски терени на кејот на Вардар, на потегот кај Маџир Маало, место кое повторно се враќа на граѓаните како центар на рекреацијата, спортот и дружење.
Кејот на Вардар е еден од моите клучни приоритети. Уште од првите денови по преземањето на функцијата градоначалник, започнавме со темелно чистење и уредување, со цел реката повторно да тече во своето природно, достоинствено корито, а просторот околу неа да стане вистинска урбана вредност. Денес, овој дел од градот добива нова димензија – функционален, модерен и динамичен јавен простор, отворен за сите генерации.
Реконструирани се терените за фудбал и кошарка, поставена е нова урбана опрема, трибини и ограда. Инвестирањето во спортот значи инвестирање во иднината, во здрави млади генерации, во дисциплина, дух на победа и во силно општество.
Искрена благодарност до министерот Борко Ристовски за поддршката и партнерскиот пристап. Ваквата соработка носи конкретни резултати и создава проекти со вистинска вредност за граѓаните.
Преку рамномерен развој во сите општини создаваме еднакви можности и активен, здрав живот за секој скопјанец, без разлика каде живее, порача градоначалникот на Скопје Орце Ѓорѓиевски преку општествената мрежа.