Повеќе од 50 работнички од штипска конфекција вчера се соочија со заклучени врати пред фирмата, наместо да се вратат на работните места.
Сопствениците на фирмата, странски државјани – еден од Хрватска и друг од Германија – исчезнале без никакво известување, оставајќи ги вработените без исплатени плати и без никаква можност за контакт.
На вратата од конфекцијата било залепено кратко соопштение во кое се наведува дека вработените треба сами да се пријават во Агенцијата за вработување, но без никаква информација за исплата на заостанатите плати или за статусот на фирмата.
Ниту сопствениците, ниту директорката се достапни – не одговараат на телефонските повици на вработените.
„Газдите ни се Хрват и Германец, а ние немаме кому да се обратиме. Ова што не лажат дека залепиле нешто, тоа е само до кога ни е договорот, но нема на кого да се обратиме, а ние платата ја бараме од газдите и директорката, од тие што потпишуваат.
Нив никаде ги нема, ниту да ни отворат, ниту да се појават“, изјавија револтирани работнички.