Државниот јавен обвинител, Љупчо Коцевски денеска изјави дека постојат основани на сомненија дека осомничените како службени лица сториле тешки дела против општата сигурност.
„Јавен обвинител од специјализираното одделение за гонење на кривични дела сторени од лица со полициско овластување и припадници на затворската Полиција при ОЈО за организиран криминал и корупција, постапувајќи по кривична пријава поднесена од страна на МВР –Оддел за внатрешна контрола, криминалистички истраги и професионални стандарди донесе наредба за спроведување на истражна постапка против 13 полициски службеници. Во конкретниот случај постои основа на сомнение дека во период од 14 март 2025 година до 16 март 2025 година на територијата на СВР- Штип осомничените како службени лица сториле тешки дела против општата сигурнос“т, рече Коцевски.
Тој на прес-конференцијата појасни дека 13 полициски службеници, како соизвршители не постапиле според прописите за мерките за заштита, одобриле план за Акциска контрола на угостителски објекти на подрачје на Полициска станица (ПС)-Кочани, без да проверат дали истиот ги има опфатено сите проверки во надлежност на МВР и дали се запазени одредбите од стандардните оперативни процедури за процена и управување со ризики при вршење на полициски работи.„о овој План кој бил изготвен врз основа на претходно изготвени планови без какви било измени било постапено и на 16 март 2025 година на место каде што биле собрани поголем број на луѓе во кабарето „Пулс“, не преземале мерки за спречување на активирање на пиротехничка опрема на сцената, каде настапувала музичката групата ДНК, во моментов кога ја вршеле контролата, чие палење не било пријавено во Полициска станица-Кочани, а од која пиротехника како последица настанал пожар во дискотеката „Пулс“, изјави Коцевски.
Коцевски додаде дека полициските службеници, со тоа што не спречиле палење на пиротехниката, тие не преземале мерки и за заштита за присутните лица во дискотеката „Пулс“, каде поради несоодветните услови за работа на акциската контрола настанал пожар и со тоа предизвикале настапување на смрт на 62 лица, а над 200 лица се здобиле со потешки и полесни повреди. Заради непречено водење на кривичната постапка и обезбедување на присуство на обвинитите Јавниот обвинител на судијата на претходна постапка на Основниот Кривичен суд Скопје му предложи спрема осомничените да се определат мерки на претпазливост.
„Тоа се: забрана за напуштење на живеалиштето, односно престојувалиштето, обврска на обвинитете да се јавуваат повремено на определено службено лице, или кај надлежен државен орган, кој ќе ги определи судијата на претходна постапка, привремено одземање на патна или друга исправа за применување на државната граница, односно забрана за нејзино издавање, забрана и контакт со определени лица, со осомничените лица, како и забрана за преземање на работни активности –полициски служби„, рече Коцевски.