На 103-годишна возраст почина д-р Никола Стојановски, потврди неговото семејство.
Тој беше првиот претседавач на конститутивната седница на повеќепартиското Собрание на Македонија во 1991 година, долгогодишен претседател на Сојузот на борците од Народноослободителната антифашистичка војна на Македонија (НОАВМ) 1941-1945 и еден од последните живи учесници во Народноослободителната борба.
Роден на 8 февруари 1923 година во велешкото село Скачинци, д-р Стојановски беше сведок и учесник во клучни историски периоди на земјата. Како гимназијалец учествувал во штрајкот на велешките ученици во март 1942 година против воведувањето на бугарскиот јазик во наставата, а подоцна станал партизан во НОБ.
Дипломирал на Медицинскиот факултет во Белград во 1952 година, а специјализација по педијатрија завршил во Загреб во 1958 година. Целиот свој работен век го посветил на децата како педијатар и хематолог во Велешката болница, каде бил и директор. За него велешаните имаат само пофални зборови – бил познат по посветеноста, спокојството и љубовта кон пациентите, без разлика на потеклото.
Како најстар пратеник во првиот повеќепартиски состав, на 8 јануари 1991 година ја водеше конститутивната седница на Собранието сè до изборот на Стојан Андов за претседател.
„Се сеќавам на тоа турбулентно време. Секоја партија сакаше да преовладува… Но, морав смирено да ја водам седницата“, раскажуваше тој.
Во последните години престојуваше во Специјализираната болница за геријатриска и палијативна медицина „13 Ноември“ во Скопје, каде во февруари 2026 година го прослави 103-тиот роденден. Местото и времето на погребот ќе бидат дополнително објавени.
Со смртта на д-р Никола Стојановски Македонија загуби еден од последните живи сведоци на антифашистичката борба, симбол на посветеност на медицината и важна фигура од раните денови на независна Македонија. Неговото дело останува впишано во темелите на македонското здравство и историја.