Поранешната министерка за внатрешни работи го впери прстот кон некогашното Специјално јавно обвинителство (СЈО) за застарувањето на дел од предметот „Талир“ за наводното незаконски финансирање на ВМРО-ДПМНЕ.
„Застарел дел од предмет што ниту можело ниту требало да биде предмет на кривично гонење, ако барем некои од оние кои се занимавале со него се држеле до законот, правдата и правото, а не се воделе од политички диктати. СЈО и сите таму беа ‘црпнати’ за да дадат одговор кој, кого и зошто незаконски прислушкувал со години, 24/7. Се занимаваа со сè освен со тоа за што беа формирани. Водеа кадровска политика во политичките партии преку политички прогон, ‘билдаа’ партиски рејтинзи за изборни цели, преку закани и притисоци одбираа владини партнери, не според освоени гласови, туку според дневно политички потреби, и сега проблем бил Кривичниот законик од 2023 (кој сам по себе е тема за посебна дебата). Не е ниту до тој ниту до кој било друг закон. До правниците е, кои во сè гледаа математика и тераа политика, си кркаа незаконски бонуси и десет години парадираа до судовите како холивудски ѕвезди и градеа метеорски кариери, ама не заради резултати или квалитет, туку заради сервилност кон претходната власт!“, коментира на Фејсбук една од жртвите на прогонот на расформираното СЈО.