Домашните компании подготвени чекаат голем дел од колачот за работа на проектите. Но, апелираат со законски измени да им се овозможат олеснителни услови за да бидат поконкурентни. Градежниот сектор очекува олеснителни околности при тендерските постапки за да им бидат конкурентни на странските компании во градење на инфраструктурните проекти. Имаат капацитет, но потребни им се искуства и знаења во делот на изградбата и реконструкцијата на пруги за МТВ, вели Андреа Серафимовски од Здружението на градежници.
Час поскоро да се искористи геостратешката положба и да се изгради делот од Коридорот 10 железничкиот сообраќај од Табановце до Гевгелија за да не останеме слепо црево, сугерираат економистите. Договорот со Обединетото Кралство ќе обезбеди брзи и евтини пари за капитални инвестиции кои ќе придонесат за зголемување на растот.
Имплементацијата на проектите ќе биде поддржана од високо ниво на експерти од Обединетото Кралство, кои ќе обезбедат квалитетна и навремена имплементација на проектите, додека од друга страна, ќе го зголемат квалитетот на градежните компании во Македонија и ќе донесат ново знаење и искуство во земјата, изјави вицепремиерот и министер за транспорт Александар Николоски.
Тој најави дека во изградбата на брзата железница, техничка поддршка ќе добие компанија од Велика Британија која го изгради најсофистицираното дигитализирано метро во Лондон.
- При секоја посета на Лондон, многу зборувам за техничка поддршка, тоа е нешто многу важно, нешто што значи искуство и знаење, а за мене е подеднакво важно како и финансиската компонента. Во однос на железницата, разговараме за добивање техничка поддршка од најсилната компанија во Обединетото Кралство, а тоа е Кросреил.Тоа е компанијата што ја изгради најновата и најдолгата линија во Лондон, првата дигитализирана линија на метрото во овој дел од светот, линијата на метрото „Елизабета“, која го носи името по кралицата Елизабета. Значи, зборуваме за таков вид експерти и зборуваме за проект од 20 милијарди фунти, па само овој проект е четири пати поскап од оној што го имаме како договор.Преговараме со тој профил на луѓе да дојдат и да ни помогнат, бидејќи таквата помош е двострана. Eдниот е краткорочен, бидејќи имате сигурна и висококвалитетна имплементација на проектот, а второ, обучувате персонал за иднината, рече Николоски.
Со првата транша треба да се обезбедат 2 милијарди евра. Еден од ризиците е работната сила.