Поранешниот градоначалник на Струмица, Костадин Костадинов, заедно со уште пет лица, е осомничен за нерегуларности во набавката на десет електрични автобуси за ЈП „Струмица-Транспорт“ во вредност од 429.933.595 денари (околу 7 милиони евра).
Според полициската истрага, тендерот бил скроен според карактеристиките на конкретен модел автобуси, со што е овозможено претходно договарање. Дополнително, целата техничка постапка – од изработка на тендерската документација, преку евалуација до надзор на реализацијата – била доверена на лице кое поседувало само лиценца „Б“ и немало потребна лиценца „А“ за електротехника, ниту пак стручни квалификации за ваков проект.
Комисијата за јавни набавки (К.Б., Л.Ј. и Л.Ѓ.) го ангажирала истото неквалификувано лице за технички надзор, а директоротогашен директор на ЈСП „Струмица-Транспорт“, Д.П.С., го потпишал договорот без да провери дали постапката е законска.
Од МВР велат дека со ваквото однесување осомничените можеле сериозно да ја загрозат безбедноста, квалитетот и реалната вредност на набавените возила.