Министерството за социјална политика, демографија и млади на Македонија и Министерството за семејство и социјални услуги на Турција склучија Меморандум за разбирање и соработка во областа на социјалните услуги, на кој потпис ставија министрите Ѓоко Велковски од македонска страна и Махинур Оздемир Гокташ од турска.
„Меморандумот претставува основа за продлабочување на институционалната соработка и размена на знаења, искуства и добри практики во повеќе области од значење за унапредувањето на социјалната заштита и благосостојбата на граѓаните. Соработката опфаќа области поврзани со јакнењето на семејството, развојот и унапредувањето на социјалните услуги за семејствата, жените, децата, лицата со попреченост и постарите лица, како и подобрување на социјалната интеграција на лицата со зависности“, соопшти Министерството за социјална политика, демографија и млади.