Македонската кула, една од најпознатите знаменитости во северозападниот турски град Едрене, повторно се отвора како музеј по речиси четири години реставрација и археолошки ископувања.
Кулата висока 48 метри е нарачана од римскиот император Адријан за време на неговото владеење од 117 до 138 година од н.е. и е единствениот зачуван дел од античките ѕидини што некогаш го опкружувале градот. Во 1867 година отоманскиот губернатор Хаџи Изет-паша додал дрвени горни нивоа и часовник, а структурата служела како саат-кула со децении.
Реставраторските работи, започнати од турското Министерство за култура и туризам во декември 2021 година, беа спроведени заедно со археолошките ископувања околу локацијата. Околните простори, каде што беа откриени римски и византиски остатоци, се претворени во археолошки парк, а самата кула е трансформирана во Музеј на Македонската кула во Едрене.
Музејот изложува 76 артефакти пронајдени во внатрешноста на кулата и блискиот кварт Калеичи, заедно со повеќе од 100 археолошки предмети изложени низ целиот локалитет, вклучувајќи парчиња зачувани на нивните оригинални локации. Колекцијата ја одразува историјата на локалитетот низ римскиот, византискиот, отоманскиот и републиканскиот период.
Според историските записи, Македонската кула била неречена така бидејќи гледала и била насочена директно во правец на Македонија. Таа била една од четирите главни заштитни кули на античките градски ѕидини кои го бранеле градот Адријанопол, денешно Едрене, од тој правец.