За самиот крај, пред воодушевената многубројна публика, беше оставена неслучајно, туку со причина, култната „Македонско девојче“. Пред оваа песна, слушавме како Котецу магично ги пее на македонски јазик и „Болен ми лежи Миле Поп Јорданов“ и „Ако умрам или загинам“
Сега веќе премногу добро познат – со текот на времето стана омилен јапонскиот пејач – Казухиро Котецу викендов одржа незаборавен концерт во Македонската филхармонија, со својата исклучителна интерпретација на македонските народни евергрини. И тоа под многу симболичен наслов „Јапонското срце бие во македонски ритам“, во беспрекорна организација на „Термолифт“ од Куманово. Меѓу другите музички бисери ги слушнавме и „Ако умрам ил загинам“ и „Болен ми лежи Миле Поп-Јорданов“. Беше интересна изведбата на шегобијната песна „Коце берберот“ од репертоарот на легендарниот македонски пејач и композитор, Јонче Христовски. За самиот крај, пред воодушевената многубројна публика, беше оставена неслучајно, туку со причина, култната „Македонско девојче“. Овие внимателно избрани композиции ја истакнаа поврзаноста меѓу македонската и јапонската култура и меѓу двата народа, кои одлично се разбираат преку песната. 
Покрај распеаниот, комуникативен, но и многу дружељубив Котецу, што се виде подоцна на одличниот коктел, учествуваа и јапонскиот женски хор „Tomoni Utao“ во пијано-придружба на Акико Каназава, македонската сопранистка Елена Васова, македонскиот мешан хор „Про-арс“ под диригентство на Сашо Татарчевски (ги исполни песните „По друм одам, мајче“, „Дервишко моме“ и „Калајџиско“), како и специјалните гости: пијанистот Иван Трајковски и јапонската сопранистка Чихиро Суганума.
Низ тие три распеани музички блока, магијата од зборови ја создаде познатата водителка, пејачка и шефица на женскиот хор „Фрида“, Сузана Турунџиева. Таа истакна дека Котецу секогаш знае да разнежи со своето маестрално пеење. Затоа не треба да се прераскажува за впечатоците. Тие се резултат на убава игра од силни емоции и позитивна енергија. Во публиката забележавме и доста познати македонски личности, кои беа дојдени да уживаат во пеењето на Котецу. И навистина уживаа.
Мотото на Котецу е „Љубовта кон земјата, културата и луѓето најсилно се слуша преку музиката“.
– Тоа го најдов во македонските народни песни, кои ми ја греат душата од првиот ден кога ги слушнав и кога научив, како Јапонец, да ги пеам на, за мене, милозвучниот македонски јазик – вели тој.
извор: Вечер прес