Македонските граѓани се соочуваат со проблеми при користењето и замената на возачките дозволи во Италија. Туристи пријавуваат дека компаниите за изнајмување возила одбиваат да им издадат автомобил само со македонска дозвола, додека иселениците со постојан престој повеќе не можат директно да ја заменат со италијанска.
Неколку македонски туристи кои деновиве престојуваат во Италија биле известени дека за изнајмување автомобил мора да приложат меѓународна возачка дозвола. Вработените во компаниите им објасниле дека добиле нови насоки за клиенти чии дозволи се издадени надвор од Европската Унија.
Дополнителен проблем претставува тоа што македонската возачка дозвола не се наоѓала во каталогот со обрасци што го користеле рент-а-кар компаниите за проверка на документите.
Ситуацијата е посериозна за македонските државјани кои живеат во Италија. Во моментов тие немаат можност директно да ја заменат македонската дозвола со италијанска, па за добивање локален документ треба повторно да ја поминат постапката за полагање.
Ова особено ги погодува лицата чие работно место зависи од управување со возило. Дел од иселениците се соочуваат со ризик да останат без работа поради неможноста навреме да обезбедат важечка италијанска дозвола.
На интернет-страницата на Министерството за внатрешни работи е наведено дека замената на дозволите издадени со називот „Република Северна Македонија“ во Италија во моментов не се спроведува. Старите дозволи со називот „Република Македонија“ формално биле опфатени со претходниот договор, иако македонските граѓани имале обврска да ги заменат до почетокот на 2025 година.
Причината за застојот, според достапните информации, е поврзана со разликите меѓу македонскиот и италијанскиот модел на возачки дозволи. Во македонскиот образец биле внесени дополнителни категории, меѓу кои и категории за управување со земјоделски машини, поради што италијанската страна побарала целосно ново усогласување.
Тоа значи дека двете држави треба повторно да ги усогласат документите, категориите и административните правила, а потоа да потпишат нов договор. По неговото стапување во сила треба да бидат известени надлежните институции, автошколите и компаниите за изнајмување возила.
Од Министерството за надворешни работи и надворешна трговија велат дека македонската страна ги завршила потребните формалности и дека се очекува конечно одобрување од италијанските институции.
По завршувањето на усогласувањето треба да следува потпишување на договорот, со што повторно би се овозможило признавање и замена на македонските возачки дозволи во Италија.