Малинка Ристевска-Јорданова, експертка за евроинтеграции и поранешна директорка на Институтот за европска политика (ЕПИ), во изјава за „Локално“ ја критикува предлог-резолуцијата на СДСМ за деблокирање на европскиот пат на Северна Македонија, истакнувајќи дека таа содржи внатрешни противречности.
„Предлог Резолуцијата се сведува на тоа да се легитимира она што го направи претходната влада, прифаќајќи го францускиот предлог и да се ‘протуркаат’ што поитно уставните измени, кои само ќе создадат нови услови и основи за блокади. Не се предлагаат нови механизми за да се подобри македонската позиција.Со писмо оваа сложена ситуација не се решава. Залагањето за реформи и отчетност пред Собранието секако се позитивни, но и тука работите се измешани – на пример Реформската агенда е еден посебен инструмент, кој треба да биде комплементарен, но во никој случај не треба да се идентификува со преговарачкиот процес за пристапување во ЕУ.“
Според неа, недостигот од консензус меѓу главните политички партии ја ослабува позицијата на земјата во преговорите со ЕУ и ги продлабочува внатрешните општествени поделби.