Премиерот Христијан Мицкоски од говорницата во Кичево го пофали усвојувањето на законите за зголемување на пензиите за 2000 денари и за ваучери за студентите во вредност од 15 300 денари. Тој порача дека сега доаѓа времето на надеж и визија за подобро утре
-Со голема чест и големо срце стоев вечерва во Кичево меѓу вас, во градот кој има дадено многу за нашата татковина. Град со традиција, со борбен дух и со луѓе што знаат што е вредност, што е достоинство, што е исправност и од тука имам две убави вести, поминаа законите за повисоки пензии за 2000 денари и за ваучери од 250 евра за таблет или лаптоп за студенти.
Оваа вечер беше посебна. Не само затоа што бев со вас, туку затоа што заедно можеме да погледнеме наназад, на една година исполнета со борба, со работа, со резултати. Но, уште поважно, да погледнеме напред. Со надеж. Со план. Со волја за промена и за подобро утре за секој еден човек во нашата Македонија.
Во образованието ја направивме најголемата промена досега. За првпат по седум години, учебната година започна со над еден милион учебници, поставени на училишните клупи уште на првиот училишен ден. Нешто што не беше случај изминатите седум години, кога владата ја предводеа СДСМ и ДУИ. Никој не веруваше дека е возможно, но ние покажавме дека кога има волја, има и резултати. Испечатени се над 100 нови наслови за средното стручно образование. Се градат нови училишта, се градат нови спортски сали, комплетно се реконструираат училишта, итн. Се она коешто е потребно нашите најмили, децата, да го добијат, а тоа е образованието.
И не само основното и средното образование, вложуваме и во студентите. По долгогодишен застој, конечно се одблокирани објектите за ФИНКИ и Факултетот за физичка култура. Тоа се генерации што нема да студираат во импровизирани простории, туку во современи згради, со современи услови. Во 2025 година, како што претходно можевте да видите, обезбедени се 38 милијарди денари за образованието. Тоа е најголемиот влог и буџет досега во обраованието. Тоа е јасна порака, дека иднината на Македонија е во знаењето.
Но, ние не застануваме тука. Знаеме дека без економски развој, нема стабилна држава. И затоа ја отворивме вратата за инвестициите. И домашни и странски. Ова е време на надеж. Време на визија. Време кога конечно се враќа верата дека вреди да се остане тука. Вреди да се работи тука. Времето на Македонија која допрва доаѓа. Оваа година беше година за вас. За секој еден од вас. За секое дете, секој млад човек, секој родител и секој пензионер, порача премиерот Христијан Мицкоски.
