Премиерот Христијан Мицкоски ја обвинува опозицијата дека ја води најниската форма на политика – некрофилска политика.
Во своето гостување на Телма, тој зборуваше за барањата за Анкетна комисија во врска со трагедијата во Кочани.
-Внимателно ја слушам дебатата на политичката сцена. Од опозицијата стигнуваат какафонични пораки. Претседателот на СДСМ од една страна обвинува дека судството и обвинителството се под политички притисок од оваа Влада која јас ја предводам, и сега кога овој случај е таму воден од обвинителството, а започнува во судството, тој вели „не, дебатата да ја пренесеме во Парламентот“. Тоа не го прават тие за да ја истераат работата до крај бидејќи тие немаат алатки ниту пак кредибилитет. Тие тоа го прават исклучиво за политизирање и тоа е онаа најниска форма на политика – некрофилска политика која ја води опозицијата, истакна Мицкоски.
Барањето на СДСМ за Анкетна комисија беше прифатено од пратеничката група на ВМРО-ДПМНЕ, рече Мицкоски и објасни дека од страна на владејачката партија било побарано да се зборува и за сите оние останати трагедии од минативе години.
-Апсолутно сите виновници треба да се изведат пред лицето на правдата. Во најмала рака, кога во Парламентот има ваков тип на анкетна и надзорна расправа, тогаш треба граѓаните да видат и да слушнат кој е тој што направил грешка, кој е виновен. И јас апсолутно ја поддржувам идејата на пратениците, еве, нека има анкетна и надзорна расправа, рече Мицкоски.