Премиерот Христијан Мицкоски вечерва порача дека судскиот процес за трагедијата во дискотеката „Пулс“ во Кочани мора да се одвива целосно независно и без политички притисок, иако, за жал, некои политички партии се обидуваат да ја искористат болката на семејствата за да градат сопствена кариера.
„Лично мислам дека мора така да биде, не може да биде поинаку. Е сега, има тука одредени политички партии што на овој случај, за жал, на маката на луѓето кои ги изгубија своите најмили, се обидуваат да градат политичка кариера. И затоа не можеме да кажеме дека нема политичко влијание, бидејќи тие политичари и тие политички партии се обидуваат да ја злоупотребат оваа мака“, рече Мицкоски во гостувањето на Телма.
Премиерот нагласи дека тој лично молчи и остава обвинителството и судството мирно да ја завршат работата, за разлика од опозицијата која постојано испраќа политички пораки. Потенцира дека сака фер и транспарентно судење кое недвосмислено ќе ги утврди виновниците.
Мицкоски ја поддржа одлуката на пратеничката група на ВМРО-ДПМНЕ и коалицијата за формирање анкетна и надзорна комисија што ќе ги испита сите трагични настани од изминатите години и ќе ги изнесе пред лицето на правдата апсолутно сите виновници.
Го критикуваше лидерот на СДСМ за, како што рече, очигледно лицемерие и „некрофилска политика“: од една страна тврди дека судството е под притисок на актуелната власт, а од друга бара дебатата да се префрли во Собранието – не за да се реши случајот, туку исклучиво за политизирање.