Премиерот Христијан Мицкоски денеска јавно ги демантираше информациите дека неговиот син Антониј бил во потешка здравствена состојба од останатите ученици по масовното труење во основното училиште Димо Хаџи Димов.
„Антониј беше дел од групата деца на кои им се случи ова немил настан. Некои медиуми пренесоа дека е во тешка состојба и дека бил хоспитализиран. Сакам јасно да демантирам – тој беше во иста состојба како и сите други дечиња. За жал, имаше и такви што правеа непотребна драма, а тоа не е вистина“, изјави Мицкоски.
Тој потврди дека и неговиот син бил жртва на труењето, дека три дена примал инфузија и не одел на училиште, но состојбата никогаш не била загрижувачка.
„Антониј е храбро, пргаво и динамично момче, сака да се дружи. Претпоставувам дека во жарот на дружењето и за време на ручекот во целодневната настава конзумирале иста храна како и останатите“, додаде премиерот.
Мицкоски нагласи дека ги остава надлежните институции мирно да ја завршат работата.
„Агенцијата за храна и ветеринарство и Институтот за јавно здравје ги вршат сите неопходни испитувања. Да почекаме да ги соопштат наодите и да не брзаме со судови“, рече тој.
На крајот додаде дека неговиот син денеска веќе се чувствува многу подобро и изрази надеж дека од понеделник, заедно со другарчињата, ќе се врати на редовна настава и на нормално функционирање.