Македонскиот премиер Христијан Мицкоски на заедничката прес-конференција со претседателот на Европскиот совет, Антонио Кошта, порача дека Македонија не бара привилегии во пристапниот процес кон Европската Унија, туку кредибилен и предвидлив процес заснован на принципи.
„Нашата позиција е јасна. Остануваме цврсто определени кон европскиот пат. Не бараме привилегии. Не бараме олеснети правила. Не бараме нешто што не им припаѓа и на другите. Бараме принципи и, нормално, кредибилен и предвидлив процес. Бараме процес во кој реформите, трудот, заслугите и исполнетите обврски ќе бидат вистински вреднувани“, рече Мицкоски.
„Денес отворено разговаравме и за реалноста што ја чувствуваат многу наши граѓани. По години чекање, компромиси, очекувања, исполнети барања и чести промени на политичкиот контекст, природно е во одредена смисла да чувствуваат поголема неизвесност, а од друга страна потребна е поголема извесност. Токму затоа, денес е потребно лидерство. Потребна е јасност. Потребна е доверба. Европа била најсилна тогаш кога покажувала визија, политичка храброст и доследност кон сопствените вредности. Кога била простор на можности, правда и предвидливост“, додаде претседателот на македонската Влада.
„Верувам во партнерски дијалог. Верувам во искрен разговор, меѓусебна почит и заемно разбирање. Но, верувам и дека достоинството, идентитетот и принципиелноста не треба да се пречка за европската перспектива. Тие се нејзин составен дел“, истакна Мицкоски.