Претседателот на Владата и на ВМРО-ДПМНЕ, Христијан Мискоски, му прецизира на лидерот на СДСМ, Венко Филипче, дека укинувањето на техничката влада ќе важи по следните парламентарни избори, независно дали ќе бидат редовни или привремени.
„Измените во Законот за влада велат дека на следните парламентарни избори останува да важи техничката влада, а тоа подразбира дека, како што беше за изборите во 2024-тата, на изборите во 2020-тата, на изборите во 2016-тата, така и сега на следните парламентарни избори останува техничката влада. Јас 100 дена пред одржување на изборите како политички претседател на Владата давам оставка, доаѓа технички премиер, го бира Парламентот, опозицијата СДСМ учествува со свои кадри во рамките на владините тела, министерства, заменици-министри итн. Јавноста мора ова да го знае, ова е факт дека на следните избори ние ќе имаме техничка влада“, изјави Мицкоски во Дневникот на ТВ Сител.
„Бидејќи самиот претседател на СДСМ вели дека тие се толку силни и организирани, луѓето го препознаваат тоа, се приклучуваат кон СДСМ видни интелектуалци, професори итн., претпоставувам дека на следните избори на коишто ќе има техничка влада тие ќе победат и ќе формираат политичка влада. Законот вели дека од тие избори потоа, нема да важи, а тоа значи дека тие коишто ќе ја предводат владата после победата на следните избори веќе ќе немаат техничка влада, ќе можат да си владеат со владата, ќе можат да ја управуваат државата итн. Тоа се законските измени, тоа е суштината”, додаде Мицкоски.