Премиерот Христијан Мицкоски оцени дека податоците за инфлацијата во јули и август се охрабрувачки. Во двата месеца таа била пониска од просекот во Европската Унија.
„Имаме два месеци коишто не охрабруваат – тоа се јули и август. Во јули беше 2,3%, во август 2,6%, во услови кога во Европа во јули беше 2,9%, а во август 3,2%“, рече Мицкоски.
Тој потсети дека пред четири години, за време на енергетската криза, повисоката инфлација кај нас во однос на ЕУ се објаснувала со увезена инфлација. Според него, најновите бројки покажуваат дека е можно да се биде и под европското ниво.
„Еве, ние покажавме дека тоа не е точно и дека тоа биле лажни кампањи, дека можело да се биде на ниво под тоа коешто го има европското, и тоа за 50% пониска инфлација“, изјави премиерот.
За септември Мицкоски рече дека треба да се почекаат официјалните податоци од Државниот завод за статистика.
„Сè уште месецот трае; да почекаме статистиката да објави, па ќе можеме да коментираме“, нагласи тој.
Преку Државниот пазарен инспекторат, додаде, се следат движењата на цените, особено кај прехранбените производи и безалкохолните пијалаци. Според првичните проценки, инфлацијата кај овие категории на годишно ниво се очекува да се движи меѓу 1,5 и 2 проценти. Конечните податоци ќе ги објави ДЗС.