Делото и идеалите за слободна и достоинствена Македонија остануваат трајна инспирација, а денешниот патриотизам треба да се докажува преку развој, силни институции и подобар живот за граѓаните, порача премиерот Христијан Мицкоски вчера по повод 105 годишнината од убиството на Ѓорче Петров.
„Денес, кога оддаваме почит на неговиот лик и дело, не се поклонуваме само пред човек кој го вгради својот живот во темелите на историската ВМРО, туку и пред една идеја која останува жива повеќе од еден век.
Идејата дека Македонија има право на своја иднина, дека македонскиот народ има право на достоинство, дека слободата има цена, а таа цена секогаш ја плаќаат најхрабрите, најчесните и најпосветените луѓе на своето време-рече Мицкоски.
Ѓорче Петров преку своето капитално дело ,,Материјали по изучувањето на Македонија“, рече Мицкоски, покажал дека љубовта кон татковината се изразува и преку знаење, истражување и зачувување на историјата и идентитетот, и додаде дека историјата има вредност само ако се применат нејзините поуки за иднината.
Тој додаде дека историјата има вредност само тогаш кога знаеме да ги препознаеме поуките што ни ги остава.
„ Ако денес зборуваме само за минатото, а не научиме ништо за иднината, тогаш не сме ја исполниле нашата должност кон оние што ја создавале оваа држава“
Според Мицкоски, денешната генерација има обврска да изгради силна и просперитетна Македонија, со развој, силни институции, еднаква правда и можности засновани на труд.
Патриотизмот, рече Мицкоски, денес не се мери со големи зборови, туку со резултати, нови инвестиции, секое ново работно место, со реформи кои ја прават државата поорганизирана, посилна и поуспешна, и како што вели тој, со способноста да се создадат институции во кои граѓани ќе имаат доверба и држава што ќе биде стабилна, економски силна и почитувана.
-Токму затоа нашата борба денес е борба за развој. Борба за силна економија, за нови инвестиции, за подобри плати, за модерно образование, за здравство што ќе биде достапно и квалитетно, за владеење на правото, против корупцијата борба. Борба за Македонија која ќе биде држава на можности, а не држава на изгубени шанси. Тоа е современиот патриотизам- заклучи Мицкоски.
Мицкоски рече дека животот на Петров потсетува дека Македонија секогаш била најсилна кога Македонците биле обединети околу своите национални интереси.
„ Затоа денес повеќе од кога било имаме обврска да разговараме повеќе, да се почитуваме повеќе и кога станува збор за националните интереси да покажеме зрелост, достоинство и чувство за заедничка одговорност.
Македонија има потреба од самодоверба, доста бевме „Македончиња“, треба да бидеме Македонци. Има потреба од народ што верува во своите способности. Има потреба од институции што работат, економија што создава вредност, образование што создава знаење а не просечност- рече Мицкоски.
Тој додаде дека токму тоа е суштината на делото на Ѓорче Петров.
„Да се сака Македонија доволно силно за секој ден да се работи на нејзиниот напредок, да се биде мудар и чесен, истраен кога изгледа дека целта е далеку“ рече Мицкоски на одбележувањето на годишнината од убиството на Ѓорче Петров што се одржа во скопската општината што го носи неговото име.