Премиерот Христијан Мицкоски изјави дека ставот на Владата останува непроменет и покрај пораките од претседателот на Европскиот совет, Антонио Кошта, дека уставните измени остануваат услов за продолжување на евроинтегративниот процес.
Мицкоски беше категоричен дека Македонија нема да влезе во процес без јасен и извесен крај.
„Не постои цена што може мене како претседател на Владата да ме натера да влезам во таква авантура во која нема да има извесен крај“, рече Мицкоски.
Тој оцени дека освен првичните услови, во односите со Бугарија се појавуваат и нови барања, што го комплицира процесот.
„Не само што ова не е единствениот услов, туку напротив, таму драматично се реализира сето тоа“, додаде премиерот.
Мицкоски ја обвини опозицијата дека работи против националните интереси и повика на единство околу политиките на Владата.
„Колку повеќе сме заедно и обединети, толку повеќе сме силни и дома и надвор“, порача Мицкоски.