Во соработка со Министерството за внатрешни работи и реномирана невладина меѓународна организација ќе се отвори линија „Пријави корупција“ каде што граѓаните на кои им е побарано мито ќе можат да пријават, најави ппремиерот Христијан Мицкоски.
Премиерот вели дека пред извесно време била презентираа една анкета во која биле опфатени локалните институции и државните институции.
„На прашањето дали има корупција во вашата институција или во државата, 80 проценти велат „да, има“. На второто прашање дали вие сте биле предмет на корупција или познавате некој на општинско ниво, под 5 проценти од испитаниците, а на централно ниво под 3 проценти.
Што сакам со ова да кажам? Создадена е перцепција, нашиот народ, повозрасните, вели очи да ти извадат, муабет да не ти извадат. Создадена е перцепцијата, никој нема дилема. Но, кога ќе ги прашате, тогаш ќе видите дека системот поинаку функционира. И сега што направивме ние? Се надевам дека од август ќе почне да функционира линијата. Заедно со министерот за внатрешни работи и со една реномирана невладина меѓународна организација имавме состанок и се договоривме таа невладина организација да води еден процес „Пријави корупција“. А тој ќе биде придружен со натписи, налепници во сите општински и државни институции – рече Мицкоски.
Штом луѓето изградиле таква перцепција, штом тој стереотип е присутен, тоа значи дека тие немаат доверба во институциите, додаде премиерот.
„ Ако е така, тогаш еве оваа организација нека биде носител, а ние ќе ја подржиме. Ако пријавиш корупција тогаш ние ќе можеме да делуваме, но ако ти молчиш и не пријавуваш, тогаш ние не можеме да дејствуваме“, вели премиерот Христијан Мицкоски.
